Sou lobedyans Direksyon Vi Etidyan (DVE) ak Akademi Kreyòl Ayisyen(AKA), Rektora Inivèsite Leta lanse konkou tradiksyon ak deklamasyon « Ak lendepandans peyi a ansanm ak Diskou Dessalines nan ».
Nan sousi pou selebre desan ventyèm lane lendepandans peyi d’Ayiti ki te Premye Janvye 2024 la ak Jounen entènasyonal Lang Matènèl la ki ap tonbe jou ki ap venteyen(21) Fevriye 2024 la, Rektora inivèsite Leta a lanse yon konkou tradiksyon ak deklamasyon « Ak lendepandans peyi a ansanm ak Diskou Dessalines nan ».
Etidyan ki vle patisipe nan konkou sila ap gen pou fè tradiksyon « Ak lendepandans » peyi a ak « Diskou Dessalines» nan, nan lang kreyòl Ayisyen an. Jou k ap vandredi 19 janvye a se dènye jou pou etidyan remèt tèks la nan dekana fakilte li a. Pami patisipan yo, ven (20) etidyan ki rive fè pi bon tradiksyon yo ap gen pou pwononse diskou sila devan yon jiri ki ap konpoze ak manm Inivèsite Leta Ayiti a ak Manm Akademi Kreyòl Ayisyen.
Nan gran final konkou sa a ki ap fèt jou k ap 21 Fevriye 2024 la, jiri a ap gen pou chwazi senk moun. Ki pral benefisye de kado sa yo : laptop, liv ak meday.
