Jèn Anbasadris Observatoire de la Jeunesse Haitienne – OJH yo ap kontinye kanpay pou enfòme moun nan divès zòn nan depatman Lwès la tankou Pòtoprens, Dèlma ak Petyonvil.

Avèk estrateji mache kontre sa, OJH deside rive jwenn moun ki pa toujou gen aksè ak enfòmasyon sou sante seksyèl ak repwodiktif yo. Pale ak yo sou kesyon planifikasyon familyal, vyolans kap fèt sou fanm ak tifi, sou fanm kap ansent san yo poko pare ak divès lòt pwoblèm ki lye ak SSR.

E travay sila a ap reyalize avèk yon seri kyòs ki rele STASYON SANTE SEKSYEL POU TOUT MOUN ki genyen yon ti Speaker kap pase plizyè mesaj ( spot) kap pèmèt plis jèn konprann e pi byen pran desizyon sou sante seksyèl yo.

Depi lansman stasyon an Premye desanm 2023, anpil jenn rive benefisye enfòmasyon nan zòn tankou Kanapevè, Pòs Machan, Nazon ak Ri Panamerikèn.

Stasyon an ap kontinye pandan ane 2024 la pou rive akonpanye anpil lòt jenn pou rive kwape fenomèn ansent anvan lè a, enfeksyon ak maladi seksyèl yo e sitou pèmèt jenn ki bezwen planin familyal gen aksè ak metòd yo.

Aktivite sa reyalize nan kad swivi pwogram aksyon Doha ki jwenn bourad Fon Nazyonzini pou Popilasyon UNFPA Haiti.