Sant Kap Sipòte moun Andikape yo (Centre de Support aux personnes Handicapées- CESPHA) lanse, jounen samdi 11 septanm nan, enskripsyon dezyèm edisyon konkou foto li anba tèm ” ANDIKAP MWEN PA LIMIT MWEN” kap bout 24 septanm 2022.
Yon konkou ki gen pou objektif fè pwomosyon pou enklizyon moun andikape yo, yon fason pou make jounen entènasyonal dwa moun andikape ki selebre chak 3 desanm.
Konkou an gen 3 etap:
Premye etap la: Se pataje foto sou paj facebook CESPHA. kote 5 moun ki gen plis Moun ki Renmen foto yo a, plis pataj ak komantè yo ap kalifye pou dezyèm etap la.
2zyèm etap: wap pataje yon ti videyo ki dire youn (1) oubyen de (2) minit kote wap fè yon ti pale sou aktivite ou konn fè epi bay prèv nan videyo a.
3zyèm etap: se faz final la kote wap vin vann tèt ou devan yon jiri pou dènye desizyon an.
Si moun ki vote pou ou a pa renmen paj CESPHA a, vot la pap valide.
NB: Se CESPHA menm, kap pran responsabilite fè foto yo pou tout patisipan.
PRIM yo:
Premye a ap gen yon laptop, yon bous etid ak lòt kado.
Dezyèm nan yon tablet ak bous etid
Twazyèm nan yon telefòn plis bous etid.
Kondisyon pou patisipe
1- Fòk ou gen 16 jiska 40 rekòt Kafe
2- wap ekri sou youn nan nimewo sa yo : 38115449/36329161/38797070. Ou vle patisipe
3- wap voye nonw ak siyatiw nan nimewo a.
Enskripsyon yo ap valide lè moun nan fin ranpli tout kondisyon yo.
Responsab yo fè konnen Moun ki te nan konkou a ane pase, ki te rive nan faz final pap ka patisipe nan konkou a ankò.
Moun ki fè fo paj ap elimine otomatikman
Moun ki paka nan konkou a ankò, oubyen pou yon lòt rezon pap ka mande CESPHA retire foto I sou paj la.